5
من بلد الايمان والحكمة
من بلد الايمان والحكمة ... ومن ساس الأصالة
من سبأ بلقيس .. من مهد الحضارات العتيقـة
من أراضي ذي يزن حمير .. وهمدان البسالة
من بلادٍ جـنّ فيها المجد واضحت له عشيقــه
من جذور الأوس والخزرج بهاليل الرسـالة
قوم للقمّة .. وللعليا .. بيارقهم خليقـة
من ديار سهيل والصارم ومن نبع السلالة
أرض من مبطي مع الطولة عراويـها وثيـقـة
جيت والهاجس مقنّد رأس . ومزهّـب دلاله
في قصيدة بن صنعاني . وتحفة من عقيقة
ومن كفوفه ديم يتسبّل على قاعي جزالة
لين ينبت ورد بأوراقي وتتشكل حديقـة
والفريدة لا بغاها .. مازهم عمه وخـاله
ساقها من حر ماله ماشحتها من صديقه
مرحبا والشعر سبك وحبك وإيحاء ودلاله
لبـّه المعنى ولفظه هيكل الشكل وبريقـه
والطواريق النعوت .. وكل شاعر له مجاله
شاعرٍ ترقص طرب له . وآخـر(ن) تلعن نعيقه
شاعِرن يأرث درر .. وآخر يودّعها كلالـه
ذاك تشفق له .. وذا من جد قلبك مايطيقه
والتكلف في الشعر خلِه وضرب من الهباله
ماحلاه الشعر لاجا . فطرة . وطبع . وسليقـه
مثل شعري في بلد زايد ليا سبـّل خياله
ابتسم بحر الخليج ولوحت يمنى مضيقـه
أم وأعشقها . وعي . وادراك . وجنون . وثماله
أم يفداها زهر شعري ليا مصـّـت رحيقـه
كل ماغنيتها في بيت رحت أبغي بداله
لين ماريقي نشف .. والشعر منها نشف ريقـه
ويش أقول بناسها اللي فسلهم راعي جماله
وليه أردد والغلا مرسي على قلبي طويقـه
يارئيس الدولة القدوى .. وياتاج الشكاله
القصيد . أمجادك العظمى عن أوصافك تعيقه
يخجل الأيجاز منك . ولاتفي قدرك أطالـه
والفرايـد كل ابوها في غبب مجدك غريـقـه
ياخليفة . ياشقيق المجد . لا . يابوعياله
الشعر بحره خيال .. وبحر جودك من حقيقة
أنت بدر الحكم وخوانـك حوال البدر هالـه
وأنت ساس المجد يارأسه . ورأسك شم أنيقه
سيدي والشعر يصدح لك على النايف . بلاله
وايتباهى المجد بأفعالك على كل الخليــقــة
ولو قصيدي عنك يافيض الندى . قصرت حباله
عذره أنك غيــر . يامن دوخ المجد بـ طريــقـه
ويا إمارات الهوى .والشعر ماياصل كماله
كود لاسطـّر بقيفانه من أمجادك وثيـقـة
ياديار الولـف الأول .. والصبا . وأعذب لياله
ياقصيـدة عشق بين أحضانها ضمـّت شفيقــه
يالصباح العذب وأنفاسه . ونفحات البيالـة
ياصدى فيروز للمشتـل ..وللورد .. وشقيقـه
يامراتع طفلـةً .. عنها حشا مانيب دالــه
كود عزرائيل كأس الموت في فمي يريقه
يادياراً كل ماغنيتها في أي حالــه
يسكر المعنى بطاريـها ولا ودي أفيقـــه
مايو 14th 2009, 13:09